د کندهار پنځو ولسوالیو کې زرو مالدارانو سره د مرستې وېش لړۍ پیل شوه
دکندهار ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت لخوا، د ملګرو ملتونو دخوړو او کرنې ادارې په همکارۍ ددې ولایت په پنځو ولسوالیو کې زرو تنو مالدارانو سره دسایلجو جوړولو ماشینرۍ، منرالي خښتو او د شېدو ټولولو توکو د مرستې وېش لړۍ پیل شوه.
د کندهار دکرنې ریاست چارواکي وایي، چې یادو مالدارانو ته د څارویو حیواني خوراکي توکو او د حیواني ناروغیو مخنیوی په اړه روزنه هم ورکړل شوې ده چې په تعقیب یې یادو مالدارانو سره د اړینو توکیو مرسته هم ترسره کېږي.
ددغو مرستو په لړ کې هر یوه تن ته د شېدو یو عدد سطل، د شېدو د ساتلو ډبه، د شېدو لوټه، د شېدو فلتر او د څارویو د تقویې لپاره منرالي خښتې او د سایلج جوړولو ماشینرۍ وېشل کېږي.
د یادولو وړ ده چې د مستحقو کورنیو د سروې لړۍ د یو ګډ پلاوي لخوا مخکې ترسره شوې ده.
دکندهار کې د کرنې ریاست هڅه کوي ترڅو د بېلابېلو برنامو له لارې د بزګرو او مالدارو لاسنیوی وکړي ترڅو ددوی په کرنیز او مالدارۍ اقتصاد کې بهبود او نوښت رامنځته شي.
