کندهار کې د نسلي چرګانو فارمونو جوړولو په پار هڅې؛ دکرنې ریاست سوداګرو سره د هرراز همکاریو ژمنه وکړه

۲۸چنګاښ ۱۴۰۳ه‍.ش
۱۲ مُحَرَّمُ الحَرام ۱۴۴۶ه‍.ق
د کندهار د کرنې، اوبولګولو او مالدارۍ ریاست چارواکي وايي، دا مهال دې ولایت کې د چرګانو ۱۲۵۰ فارمونه فعالیت کوي، چې ورسره د دې ولایت د غوښې اړتیاوې پوره شوي. د کندهار دکرنې او مالدارۍ ریاست مسوولین وايي، د چرګانو د فارمونو حالت ښه شوی او چارې یې په معیاري ډول ترسره کېږي. هغوی زیاتوي اوس په دې برخه کې پر ځان بسیا دي او هلې ځلې کوي، چې په دې ولایت کې د نسلي چرګانو روزنې فارمونه هم جوړ کړي.
په همدې موخه دکندهار دکرنې ریاست په تالار کې د کرنې وزارت د مالدارۍ لوی رییس مفتي ذکرالله ذاکر، د کندهار دکرنې رییس مولوی فضل الباري فضلي، د کرنې وزارت د مقام سلاکار محمد ولي وزیري، دکندهار دکرنې ریاست مدیرانو او سداګرو په شتون کې غونډه دائره شوه.
ددې غونډې په ترڅ کې د کرنې وزارت د مقام سلاکار محمدولي وزیرې وویل، چې د چرګانو په سکټور کې له ۷۰ تر۸۰ میلیونه ډالرو پانګونه شوې او په دې برخه کې هلې ځلې کېږي، چې پانګوالو او سوداګرو ته لاډېر اسانتیاوې رامنځته شي.
په همدې حال کې دکرنې وزارت د مالدارۍ لوی رییس مفتي ذکرالله ذاکر سوداګرو سره د چرګانو روزنې د فارمونو جوړولو په برخه کې د ځمکې د ورکړې ژمنه وکړه او ویې ویل، چې د کرنې وزارت د مالدارۍ ریاست به د چرګانو روزنې سوداګرو سره د چرګانو د بازارموندنې، د بیو ټیکاو او لابراټوارونو په برخه کې هراړخیزې مرستې او همکارۍ وکړي. 
دغه راز په دې غونډه کې د کندهار دکرنې، اوبولګولو او مالدارۍ رییس په خپلو خبرو کې سوداګرو سره د هرراز همکاریو ژمنه وکړه؛ هغه وویل: «د کندهار دکرنې ریاست سوداګرو او پانګوالو سره هراړخیزې مرستې او همکارۍ ته ژمن دی، موږ چمتو یو چې پانګوالو ته د چرګانو نسلي فارمونو جوړولو په موخه د ځمکې او نورو برخو کې اسانتیاوې رامنځته کړو.»
دغه راز ددې غونډې په ترڅ کې سوداګر او پانګوال هم خبرې وکړې او د کندهار دکرنې او مالدارۍ ریاست له همکاریو څخه د مننې ترڅنګ خپلې ستونزې او وړاندیزونه د غونډې کډونوالو ته وړاندې او د چرګانو روزنې په برخه کې د پانګونې ژمنه وکړه.
کندهار کې د چرګانو روزنې د نسلي فارمونه جوړېدل لویه لاسته رواړنه ده، چې د کارموندنې، اقتصادي ځواکمنتیا، ځان بساینې او د اقتصادي ودې او پرمختیا لامل کېږي.
وروسته له هغه چې د افغانستان اسلامي امارت له بهرنیو هېوادونو څخه د چرګانو د غوښې پر واردولو بندیز ولګاوه، ورسره په کور دننه د چرګانو غوښې داخلي تولید زیات او اوس یې د کندهار د ټول ولس اړتیاوې پوره کړې دي.