هسکې مېنې او روداتو ولسوالیو ته د ننګرهار دکرنې رییس سفر
۲۸چنګاښ ۱۴۰۳ه.ش
۱۲ مُحَرَّمُ الحَرام ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن د بزګرانو د ستونزو د حل او کرنې او مالدارۍ سکټور د پراختیا په موخه هسکي مېني او روداتو ولسوالیو ته سفر وکړ.
د ننګرهار دکرنې رییس ددې سفر په ترڅ کې د هسکي مېنې او روداتو ولسوالیو مرستیالانو او ترویج مدیرانو سره ناسته وکړه او د کرنې او مالدارۍ په برخه کې یې د ستونزو دحل په اړه خبرې وکړې.
د یادو ولسوالیو مرستیالانو په دې ناسته کې د ترویج مدیریتونو دفتري وسایلو، ظرفیت لوړونې پروګرامونو،انساني او حیواني ګډو ناروغیو مخنیوی په برخه کې عامه پوهاوی، بزګرانو سیمه ییزو ښوونځیو جوړولو ګودامونو، روغنیاتو، ځنګلونو د پرېکولو مخنیوي، بڼوالۍ، اصلاح شويو تخمونو، مالدارۍ واکسینونو، حیواني خوراکي توکو او نورو اړونده برخو کې خپلې ستونزې او غوښتنې مطرح کړل.
په همدې حال کې د ننګرهار دکرنې رییس مولوي محمد ولي محسن د بزګرانو او مالدارانو د ستونزو د حل او پرمختګ لپاره د هر راز همکارۍ ډاډ ورکړ.
هغه وویل چې د هسکي مېنې او روداتو ولسوالیو ځمکي د کرنې او بڼوالۍ لپاره ښه مناسبه ده، او ژمنه یې وکړه، چې د کرنې ریاست او همکارو موسساتو له لارې به مؤثرې پروژې پلي کړي.
ښاغلي محسن همدارنګه د عشر او زکات مسؤلینو ته سپارښتنه وکړه، چې په خپلو کارونو کې روڼتیا او دیانت ولري او د ا.ا.ا کړنلارې مطابق عمل وکړي. د ننګرهار د کرنې ریاست هر کال په زرګونه بزګرانو او مالدارانو ته د کرنې او مالدارۍ په برخه کې مرستې او همکارۍ کوي.
