د ننګرهار کوټ کې د څارویو د خوراکي توکو زېرمتون جوړ او ګټې اخیستنې ته وسپارل شو
۲۵چنګاښ ۱۴۰۳ه.ش
۹ مُحَرَّمُ الحَرام ۱۴۴۶ه.ق
د ننګرهار د کرنې، اوبولګولو او مالدارۍ ریاست په هڅو د کوټ ولسوالی په جبي کلي کې د ۷ زره امریکایې ډالرو په لګښت د مالدارانو د ستونزو د حل او مالدارۍ پیاوړتیا په پار د څارویو د خوراکي توکو زېرمتون جوړ او ګټې اخیستنې ته وسپارل شو.
د ننګرهار د کرنې، اوبولګولو او مالدارۍ رییس مولوي محمد ولي محسن وویل د کوټ ولسوالی د مالدارانو د ستونزو حل لپاره ۷ زره ډالرو په لګښت ماشینري، د میل لپاره خام مواد او نور اړونده وسایل واخیستل شو.
نوموړي وویل د کوټ ولسوالی ۵۰۰ مالداران ددې فیډ میل سره ثبت او راجستر شوي، ترڅو په راتلونکي ورته روزنه ورکړل شي.
د ننګرهار دکرنې رییس زیاته کړه د څارویو د خوراکي توکو یاد زېرمتون دافغانستان لپاره د هالینډ کمېټې په تخنیکي همکارۍ او د کرنې نړۍوال سازمان په مالي لګښت جوړ او ګټې اخیستنې ته سپارل شوی دی.
باید وویل شي، چې دمالدارۍ سکتور پیاوړتیا لپاره هالنډ کمېټه د ننګرهار په یوشمېر نورو ولسوالیو کې هم د څارویو د خوراکي توکو زېرمتونونه جوړ کړي دي.
د څارویو د یاد خوراکي توکو زېرمتون د ګټي اخیستو په مراسمو کې د ننګرهار د کرنې، اوبولګولو او مالدارۍ رییس مولوي محمد ولي محسن، د کوټ ولسوال مولوي حمزه فاتح، د هالنډ کمېټې ولایتي مسؤل ډاکتر بحر الله بهیر، ترویج مدیر او قومي مخورو حضور درلوده.
