هلمند کې پر زرګونو بزګرانو د غنمو اصلاح شوي تخمونو او کیمیاوۍ سرې وېش لړۍ پيل شوه 

۲۰چنګاښ ۱۴۰۳ه‍.ش
۴ مُحَرَّمُ الحَرام ۱۴۴۶ه‍.ق
د هلمند ولایت د کرنې، اوبولګولو او مالدارۍ ریاست اړوند د ناوې او ګرمسېر  ولسوالیو د کرنیزو خدمتونو مدیریت له لوري د افغانانو د پوهې د کچې لوړولو یا (جک) مؤسسې په مالي همکارۍ د ٣٠٠٠ کروندګرو د سروې چارې پیل شوې. 
دیادې پروسې په لړ کې د ګرمسېر ولسوالی ٢٠٠٠ او ناوې ولسوالی ١٠٠٠ تنه بزګران د یوې رڼې سروې له مخې به د مستحقینو په لیست کې شامل او پر دوی به د غنمو اصلاح شوي تخمونه او کیمیاوي سرې ووېشل شي.
د یادو مستحقو کروندګرو د سروې او انتخاب چارې په اړونده ولسوالیو کې د ګډې کمیټې لخوا چې په ترکیب کې یې د ولسوالی، کرنې، امنیې قوماندانۍ او استخباراتو  استازي شامل دي ترسره کېږي.
په دغه پروسه کې هغه بزګران چې د ٢ څخه تر ٥ جریبه ځمکه ولري، اقتصادي وضعیت یې کمزوری وي، د تخم او کیمیاوې سرې د پیرلو توانایي نلري مستحق پېژندل کېږي، تر سروې وروسته هر کروندګر ته ۵۰ کیلوګرامه د غنمو اصلاح شوي تخم، ۵۰ کیلو سپینه او ۵۰ کیلو توره سره ورکول کېږي، ترڅو یاد بزګر پر وخت دغه تخمونه ترلاسه کړي او راروان دغنمو فصل ته ورته بشپړ چمتوالی ولري.
د دغو مرستو موخه په نوموړو ولسوالیو کې د اصلاح شویو تخمونو دودول، د بزګرو او ځمکوالو ملاتړ او له کمو ځمکو څخه د لوړو حاصلاتو ترلاسه کول دي
. دیادونې وړ ده، چې دغه پروسه به په نورو ولسوالیو کې هم په لاره واچول شي او زرګونه نور بزګران به هم له دغو مرستو برخمن شي.