اروزګان کې پر لسګونه هکټاره ځمکه سابه کرل شوي

۲۰چنګاښ ۱۴۰۳ه‍.ش
۴ مُحَرَّمُ الحَرام ۱۴۴۶ه‍.ق
د اروزګان دکرنې، اوبولګولو او مالدارۍ ریاست چارواکي وایي، چې ددې ولایت په لسګونه هکټاره ځمکه کې سابه کرل شوي، چې دامهال دګل نیونې په حالت کې قرار لري چې حاصلات به یې ډېر ژر بازار ته وړاندې شي.
د اروزګان دکرنې ریاست د چارواکو په خبره ددې ولایت دکرنې ریاست مسلکي کارکوونکي وخت ناوخت په دې ولایت کې د سبو او نورو کرنیزو توکو کروندو څخه د لیدنې په ترڅ کې کروندګرو ته د عصري کرکیلي، سرې ورکولو، د ناروغیو او افتونو کنټرول او نورو برخو کې هر اړخیزې سلا مشورې ورکوي.
بلخوا د اروزګان دکرنې ریاست چارواکي وایي، چې دکرنې وزارت د پرمختیایي برنامو او پروژو له لارې په دې ولایت کې د لوړ ارزښت لرونکو کرنیزو محصولاتو او د سبو او ترکاریو د کرکېلي د نویو لارو چارو دودولو په پار ددې ولایت په کچه لوی او کوچني شنې خونې جوړې شوي دي، چې په یوه کال کې دوه فصله ورکوي، چې تر ډېره په کې بادرنګ او رومي بانجان کرل کېږي.