ننګرهار کې پر سلګونو بڼوالو د بڼوالۍ اړونده توکي ووېشل شوې

۲۰چنګاښ ۱۴۰۳ه‍.ش
۴ مُحَرَّمُ الحَرام ۱۴۴۶ه‍.ق
د ننګرهار د کرنې، اوبولګولو او مالدارۍ ریاست له خوا ددې ولایت په لسو ولسوالیو چپرهار، شېرزاد، خوږیاڼي، دره نور، رودات، مومندرې، کوټ، اچین، سره رود او لعلپوره کې د بڼوالۍ د پیاوړتیا او د نشه یي توکو دمخنیو په موخه پر ۵۰۰ بڼوالو د بڼوالۍ اړونده توکي او کیمیاوي سرې وېشل شوي دي.
دغه توکي، چې د ملګرو ملتونو د پراختیایي ادارې په مالي او د اکشن اېډ مؤسسې په تخنیکي همکارۍ پر دغو بڼوالو وېشل شوي دي، په کې درملو شېندلو پمپ، څانګو پرېکولو قیچې، آره، لاسي کراچۍ، کیمیاوي درمل، ۲۵ کیلو توره او ۵۰ کیلو سپینه سره شامل دي، چې د عصري بڼوالۍ د ترویج په موخه پر بڼوالو وېشل شوي دي.
ددغو مرستو د وېش موخه د بڼوالو ملاتړ او په دې ولایت کې د بڼوالۍ د محصولاتو معیاري کول دي.
د ننګرهار دکرنې ریاست هلې ځلې کوی، چې روزنیزو پروګرامونو سره د بڼوالو وړتیا لوړ او د دوی د بڼونو محصولات ډېر او ښه کړي، چې هم د بڼوالو عواید زیات شي هم بزګران مشروع کرکېلي ته مخه کړي.
له دغو توکو څخه برخمن شوي بڼوال د کرنې وزارت له هلوځلو څخه د منني ترڅنګ ژمنه وکړه، چې د بڼوالۍ د حاصلاتو د زیاتوالي په پار هلې ځلې کوي.