د کندز د کرنې رییس د کار او ټولنیزو چارو له رییس سره وکتل
۱۴ چنګاښ ۱۴۰۳ه.ش
۲۷ ذیالحِجّة ۱۴۴۵ه.ق
د کندز دکرنې، اوبولګولو او مالدارۍ رییس الحاج مولوی امان الله حسن د یاد ولایت د کار او ټولنیزو چارو رییس مولوی احمدشاه حقاني سره د خپل کار په دفتر کې وکتل او ځوانانو لپاره د کارموندنې د پروګرامونو په اړه یې خبرې او نظرونه تبادله کړل.
ددې کتنې په ترڅ کې د کندز ولایت د کار او ټولنیزو چارو رییس د کندز ولایت بې روزګاره ځوانانو ته د کار موندنې د پروګرامونو د جوړولو ته اشاره وکړه او زیاته یې کړه:«د کندز دکرنې ریاست څخه هیله کوو، چې د کارموندنې په پروګرامونو کې فعاله ونډه واخلي او بې سواده او سوادارو ځوانانو ته د مناسب کار زمینه برابره کړي.»
په همدې حال کې د کندز دکرنې رییس وویل، چې د کرنې وزارت تل په هغو پروګرامونو کار کوي، چې تر ډېره بې کاره او اړمنو کسانو ته د کار زمینه برابروي، څرنګه چې دغه وزارت د خپلو پراختیایي پروژو له لارې هر کال د کندز او نورو ولایتو ګڼ شمېر ښاریانو په بېلابېلو برخو کې په کار کړي او د کار زمینه یې ورته برابره کړي، او د کندز دکرنې ریاست هم هڅه کوي، چې خپلې پراختیايي پروژې زیاتې کړي او د کار پیدا کولو، د بې وزلۍ او بیکارۍ په کمولو، د خوړو د خوندیتوب په برخه کې فعاله ونډه اخلي او د سیمه ییز اقتصاد د ودې لپاره د پام وړ فعالیتونه ترسره کړي».
