هلمند کې زرګونو مالدارانو ته د عامه پوهاوی لړۍ پیل شوې ده
۷ چنګاښ ۱۴۰۳ه.ش
۲۰ ذیالحِجّة ۱۴۴۵ه.ق
د هلمند ولایت د کرنې، اوبو لګولو او مالدارۍ رياست اړوند د مالدارۍ او حيواني روغتيا امر حافظ هدایت الله هدایت د هالنډ کمیټې له ولایتي مسؤل ډاکتر ثناءالحق سره د هغوی د روانو چارو او راتلونکو پلانونو په اړه د همغږۍ ناسته ترسره کړه.
په دغه ناسته کې ډاکتر ثناءالحق د خپلو روانو چارو په اړه د مالدارۍ آمر ته معلومات وړاندې کړل، هغه وویل دامهال یې ددې ولایت نږدې ١٧٠٠ ځایي مالدارانو ته د مالدارۍ په برخه کې د زده کړو لړۍ په لاره اچولې ده، چې له مخې به یې یاد مالداران له خپلو کوچنيو حيواناتو وړۍ او کورک په مسلکي ډول راټولوي او بیا به یې په بازار کي په مناسبه بيه پلوري.
ښاغلي هدایت د یادې مؤسسې له مسؤل سره د مالدارۍ په برخه کې د یو شمېر اړینو برنامو د پلي کولو وړاندیزونه شریک کړل، چې هغوی یې د تمویل په برخه کې د همکارۍ ډاډ ورکړ.
