هلمند کې دحیواني درمل پلورنځیو د معیاري کولو په پار هڅې
۵ چنګاښ ۱۴۰۳ه.ش
۱۸ ذیالحِجّة ۱۴۴۵ه.ق
دهلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا آمریت د پلان له مخې په دې ولایت کې د حیواني درملتونونو او پلورنځيو د معیاري کولو په موخه د څارنې او ارزونې لړۍ پیل شوې ده.
د همدې پروسې په لړ کې په مرکز لښکرګاه کې د مالدارۍ او حیواني روغتیا آمر حافظ هدایت الله هدایت او اړونده کارمندانو لخوا له ګڼو حیواني درملتونونو او د پلور له مراکزو لیدنې او ارزونې تر سره شوې.
د ندې څارنې په لړ کې د ګڼو هغو حیواني پلورنځیو هټۍ وتړل شوې، چې د کرنې وزارت د کړنلارې له مخې یې فعالیتونه نه ترسره کول او ترڅنګ یې له بېلابېلو درمل پلورنځیو تاریخ تېر درمل هم راټول او ضبط شول.
همدارنګه د یادې څارنې په ترڅ کې هغه شمېر دوا پلورونکي چې مسلکي وړتیا نلري ددرملو له پلور، دامراضو تشخیص، وقايې او په دې برخه کې له کار کولو څخه منع شوي دي.
ددغې څارنې او ارزونې سره به هلمند کې د بې کیفیته او تاریخ تېرو درملو، غیر مسلکي کسانو او د کيمیاوي موادو د اضرارو مخنیوی وشي او مالدارانو ته به باکیفیته خدمتونه وړاندې شي.
ددې پروسې موخه دادی ترڅو هلمند کې دغه ډول مراکز معیاري او په ټولو شرایطو برابر شي، ترڅو مالدارو ته معیاري او مسلکي خدمات وړاندې شي او د راتلونکو احتمالي خطراتو مخه ونیول شي.
