پکتیکا کې پر زرګونو بزګرانو د اصلاح شویو تخمونو او کیمیاوي سرو وېش لړۍ پیل شوه
۱۴ غبرګولی ۱۴۰۳ه.ش
۲۶ ذوالقعده ۱۴۴۵ه.ق
د پکتیکا دکرنې، اوبولګولو او مالدارۍ ریاست د «او،آر،ډي» مؤسسې په همکارۍ ددې ولایت پر زرګونو بزګرانو د لوبیا او جوارو د اصلاح شویو تخمونو او کیمیاوي سرو وېش لړۍ پیل کړی دی.
د پکتیکا دکرنې ریاست د چارواکو په خبره ددې پروسې په ترڅ کې ددې ولایت د یوسف خېل او برمل ولسوالیو پر ۲۲۰۰ بزګرانو د لوبیا او جوارو اصلاح شوي تخمونه او کیمیاوي سرې وېشل شوي دي او په نږدې راتلونکې کې به ددې ولایت په نورو ولسوالیو کې هم پر یوشمېر بزګرانو یاد توکي ووېشل شي.
ددې مرستې موخه د بزګرانو ملاتړ، د اصلاح شویو تخمونو ترویج او په ټوله کې د کورنیو خوړو خوندیتوب او د بزګرانو عوایدو زیاتوالو ته زمینه برابرول دي.
