د ننګرهار پچیراګام کې سلګونو مالدارانو سره د اړینو توکو مرسته وشوه
۱۳ غبرګولی ۱۴۰۳ه.ش
۲۵ ذوالقعده ۱۴۴۵ه.ق
د ننګرهار دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د اکشن اېډ مؤسسې په تخنیکي همکارۍ ددې ولایت د پچیراګام ولسوالی پر ۱۰۰۰ مالدارانو د څارویو خوراکي توکي، د شفتلې تخم او منرال خښتې وېشلي دي.
د ننګرهار دکرنې ریاست د چارواکو په خبره ددې مرستې په ترڅ کې هر مالدار ته د څارویو ۲۰۰ کیلوګرامه متراکم خوراکي توکي، درې کیلو د شفتلې تخم او ۱۰ کیلوګرامه منرال خښتې ورکړل شوي دي.
د څارویو د خوراکي توکو، منرال خښتو او شفتلې تخم د وېش موخه په ننګرهار کې د مالدارۍ سکتور پیاوړتیا او دکورنیو خوړو خوندیتوب دی.
باید وویل شي، چې وړاندې تردې هم د اکشن اېډ مؤسسه د ننګرهار په نورو ولسوالیو کې زرګونه مالدارانو ته د څارویو خوراکي توکي وېشل شوې وه.
