د هلمند دکرنې رییس د ژغورنې نړۍوالې کمیټې له چارواکو سره وکتل
۱۲ غبرګولی ۱۴۰۳ه.ش
۱۳ ذوالقعده ۱۴۴۵ه.ق
د هلمند ولایت د کرنې، اوبولګولو او مالدارۍ رییس الحاج مولوي نیازمحمد وهاج د ژغورنې نړۍوالې کمېټې (آی آر سي) له چارواکو سره د خپل کار په دفتر کې وکتل.
د دغې ناستې پر مهال د ژغورنې نړۍوالې کمیټې ولایتي مسؤل «پاول ثابت»، د آی ار سي سلاکار عبدالباقي حنیفي او اقتصادي مرستیال افغان حضور درلود چې په پیل کې یې کرنې رییس سره په دې ولایت کې د خپلو پلانونو او نوو پروژو د پلي کولو په هکله معلومات شریک کړل.
دوی وویل غواړي هلمند کې د اوبو لګولو په برخه کې پر ځینو پراختیایي پروژو کار وکړي، چې ددغو چارو سرته رسولو برخه کې د کرنې ریاست او اړونده مسؤلینو همکارۍ ته اړتیا لري.
په همدې حال کې د هلمند دکرنې رییس د یادې کمېټې مسؤلینو ته د ښه راغلاست ترڅنګ د کرنې ریاست لخوا د بشپړې همکارۍ ډاډ ورکړ او ویې ویل، چې یاد ولایت د اوبو ښه مدیریت په موخه پراختیایي او د بیا رغونې کارونو ته اړتیا لري، چې د یادو چارو د تطبیق پر مهال به یې اداره او کارمندان ورسره پر وخت هر اړخیزه همکاري کوي.
