ټیکا د ننګرهارڅېړنیز فارم سره د اصلاح شوي تخمونو په برخه کې مرسته وکړه 

د ترکیې د همکارۍ او همغږۍ اداره «ټیکا» د ننګرهار د کرنې، اوبولګولو او مالدارۍ ریاست د څېړنیز فارم سره په ترکیې کې تجروبه شوي اصلاح شوي تخمونو مرسته وکړه.
د ترکیې د همکارۍ او همغږۍ ادارې د کرنیزو پروژو مسؤل غالب یلماز وویل؛ «موږ د افغانستان له بېلابېلو فارمونو سره د تېلي نباتاتو او غلو دانو د اصلاح شوي تخمونو او تخنیکي برخو کې مرستې کوو».
هغه زیاته کړه: «د ننګرهار څېړنیز فارم کې مو دوه ډوله شولې، ۱۰ ډوله لمرګلي، یو نوع ممپلي او دوه ډوله د جوار اصلاح شوي تخمونو مرسته وکړه، ترڅو په څېړنیز فارم کې وکرل شي او دلته یې توافق ولیدل شي او بیا بزګرانو ته ترویج شي.»
ښاغلي یلماز وویل یاد تخمونه د ترکیې د متخصصینو له لورې تجروبه شوي، چې پر حاصله او کمو اوبو ته اړتیا لري.
د ننګرهار د کرنې، اوبولګولو او مالدارۍ رییس مولوي محمد ولي محسن وویل، چې د تېلی نباتاتو د ترویج موخه په کور دننه کارخونو ته د خامو موادو برابرول او د کوکنارو بدیل کښت ته زمینه برابرول دي.