ننګرهار کې به سږ کال نږدې ٨٤ زره ټنه د هندواڼو حاصلات ترلاسه شي

۷ غبرګولی ۱۴۰۳ه‍.ش
۱۸ ذوالقعده ۱۴۴۵ه‍.ق
د ننګرهار د کرنې، اوبو لګولو او مالدارۍ ریاست وايي، سږ کال د دې ولایت په کامې، ګوشتې، بټي کوټ او لعلپورې ولسواليو کې پر ۲۲۴۰ هکتاره ځمکه هندواڼې کرل شوي، چې د اټکل له مخې به ۸۳ زره او ۸۰۰ مټریک ټنه حاصل ورکړي.
د ننګرهار د کرنې، اوبولګولو او مالدارۍ رییس مولوي محمد ولي محسن وویل؛ که څه هم سږ کال ورستیو طبیعي پېښو د بزګرانو فصلونو ته زیان اړولې دي خو بیا هم د هندواڼو حاصلات د تېر په پرتله زیات دي.
د ننګرهار کرنې رییس زیاته کړه، چې د هندوانو دفصل په رسېدو سره به زرګونه هېوادوالو ته په مستقیم او غیر مستقیم ډول د کار زمېنه برابره شي.
د هغه په خبره، سږ کال د هندواڼو بېلابېلې ډولونه کرل شوي، چې حاصل يې ښه دى او پر ننګرهار سربېره د هېواد نورو سيمو ته هم استول کېږي.
ښاغلي محسن زیاته کړه تېر کال د ننګرهار په شیرزاد، بهسود، کامه، ګوشته، لعلپوره، بټي کوټ او کوز کونړ ولسوالیو کې پر ۱۹۶۵ هکتاره ځمکه هندواڼه کرل شوې وه، چې ۷۳ زره او ۴۸۷ مټریک ټنه حاصل یې ورکړې وه.
ننګرهار د هېواد هغه کرنیز ولایت دی، چې له نورو حاصلاتو سره سره پکې هندواڼې هرکال ښه حاصل ورکوي.