پکتیا کې د مالدارۍ ورځ ونمانځل شوه
![پکتیا کې د مالدارۍ ورځ ونمانځل شوه](https://www.mail.gov.af/sites/default/files/2024-05/img-20240525-wa0185.jpg)
۵ غبرګولی ۱۴۰۳ه.ش
۱۶ ذوالقعده ۱۴۴۵ه.ق
د پکتیا ولایت دکرنې، اوبولګولو او مالدارۍ ریاست د افغانستان لپاره د هالنډ کمېټې په همکارۍ ددې ولایت د سیمه ییزو ادارو د استازو په شتون کې د مالدارۍ ورځ د لمانځغونډې مراسم ترسره کړل.
په دغو مراسمو کې د پکتیا ولایت مرستیال والي الحاج شیخ انعام الله صلاح الدین، دکرنې، اوبو لګولو او مالدارۍ رییس مولوی سید امین هاشمي او د افغانستان لپاره د هالنډ کمیټی ولایتي مسئول سیدکریم باور ترڅنګ ددې ولایت د بېلابېلو ادارو چاروکو او مالدارانو شتون درلود.
د پکتیا ولایت مرستیال والي الحاج شیخ انعام الله صلاح الدین په خپلو خبرو کې ولس ته پر خدمت کولو د ټینګار ترڅنګ له اړونده سکټورونو څخه د لاښو پروژو د تطبیق غوښتنه وکړه.
په همدې حال کې د پکتیا کرنې رییس مولوی سید امین هاشمي د افغانستان لپاره د هالنډ کمېټې هڅې او کړنې له دې امله وستایلي، چې د پکتیا بزګرانو او مالدارنو ته په خپله برخه کې با ارزښته خدمات وړاندې کوي.
ښاغلی هاشمي دغه راز وویل: «موږ هڅه کوو، چې ددې ولایت هرډول محصولات د افغان سوداګرو په مرسته نړۍوالو بازارونو ته ورسوو».
د پکتیا په ولايت کې د مالدارۍ د ورځې په نمانځغونډه کې د شيدو لوښي او نور حيواني محصولات هم نندارې ته وړاندې شول.
پکتیا ولایت د افغانستان یو له هغو ولایتونو څخه دی، چې ډېری خلک یې کروندګر دي او خپل ژوند د کرنې او څارویو د محصولاتو له لارې پرمخ وړي.