لغمان کې په ۱۲میلیونه افغانیو پنځه چکډېمونه جوړ او ګټېاخیستنې ته وسپارل شول
۱۹ غویی ۱۴۰۳ه.ش
٢۹ شَوّال المُکَرَّم ۱۴۴۵ه.ق
د لغمان دکرنې، اوبولګولو او مالدارۍ ریاست چارواکي وایي، چې د یاد ریاست له لورې ددې ولایت په پنځو ولسوالیو کې د ۱۲ میلیونه افغانیو په لګښت جوړ شوي، پنځه چکډېمونه ګټېاخیستنې ته وسپارل شول.
د کرنې، اوبولګولو او مالدارۍ وزارت له خوا دلغمان ولایت په علینګار، علیشنګ، قرغیو، دولت شاه او بادپښ ولسوالیو کې د سېلابونو د مخنیوي، د ځمکې لاندې اوبو د پیاوړتیا، د خاورې د تخریب او د رسوبي موادو د مدیریت په موخه د ۱۲ میلیونه افغانیو په لګښت پنځه چکدېمونه جوړ او ګتې اخیستنې ته سپارل شوي دي.
په دې اړه جوړه شوې غونډه کې د لغمان مرستیال والي مولوی اختر محمدمزمل، د لغمان دکرنې، اوبولګولو اومالدارۍ رییس مولوی محمد ولي محسن، د علینګار ولسوال قاري نور الهادي څارم سعید، د قرغیو ولسوال قاري ذاهدالله فاتح او د سیمې مشرانو او اوسیدونکو ګډون درلود.
د لغمان ولایت مرستیال والي مولوي اختر محمد مزمل د یادو پروژو د پرانیست په مراسمو کې وویل، چې اسلامي امارت په هېواد کې د ټولګټو او پراختیایي پروژو پلي کولو ته ژمن دی، چې نن د لغمان په پنځو ولسوالیو کې د ٥ چکډېمونو جوړولو چارې بشپړې شوې.
ښاغلی مزمل د سیمې له اوسیدونکو وغوښتل، چې د دغو پروژو ساتنې او خوندیتوب ته جدي پاملرنه وکړي.
په ورته وخت کې د لغمان د کرنې، اوبو لګولو او مالدارۍ رییس مولوي محمد ولي محسن وویل، چې د دغه ولایت په پنځو ولسوالیو کې د ۱۲ میلیونو افغانیو په لګښت ٥ چکډېمونه جوړ شوي، چې هر چکډېم به د زرګونه متره مکعب اوبو زېرمه کولو وړتیا ولري.
ښاغلی محسن زیاته کړه، چې د جوړشویو چکډیمونو په مرسته سلګونه جریبه کرنیزې ځمکې د سېلابونو له ګواښ څخه هم خوندي شوي دي.
نوموړي وویل په یادو چکډېمونو کې یوشمېر هېوادالو ته د کار زمینه هم برابره شوې وه.
د لغمان په جوړو شویو چکډېمونو کې په کافي اندازه اوبه زېرمه شوي؛ چې پدې سره به د ځمکي لاندې اوبو سطحه لوړه، کاریزونه او چیني به تاندي شي.
هېره دې نه وي چې د سیمې اوسېدونکو د یادو پروژو له بشپړېدو څخه خوښي څرګنده کړې او له اسلامي امارت څخه د ورته کرنیزو پروژو د پلي کولو غوښتنه وکړه.
