د کورنیو اقتصادي پیاوړتیا په پارهڅې؛ ننګرهار کې ۴۰ اړمنو کورنیو ته د چرګانو واړه فارمونه جوړ شول 

د ننګرهار د کرنې، اوبولګولو او مالدارۍ ریاست په هڅو  چپرهار، پچیراګام او هسکي مېني ولسوالیو کې «د ډاکار خیریه مؤسسې» په همکارۍ ۴۰ تنو هغه مېرمنو  ته چې د کورنۍ د ګټي وټې مسولیت ور تر غاړي دي د دوی د اقتصادي پیاوړتیا په پار دوی ته د چرګانو واړه فارمونه جوړ شوي دي.
د ننګرهار دکرنې، اوبولګولو او مالدارۍ رییس مولوي عبدالستار محمد په خبره هرې ګټې اخیستونکې کورنۍ  ته ۲۰ قطعې کورني چرګان، ۲۰۰ کیلو د چرګانو دانه، درمل،  دانه خوري او ابخوري ورکړل شوي دي. 
محمد وویل د چرګانو د ورکړي موخه په کور دننه بېوزله کورنیو ته د کار زمینه  برابرول دي؛ ترڅو د خوړو خوندیتوب رامنځته او کورنۍ پر ځان بسیا شي.   
دغه راز یادو کورنیو ته د چرګانو پاللو،  ناروغیو مخنیوی د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.