د هېواد د شمالي ولايتونو د څړځايونو د تثبيت او د ستونزو د حل په موخه غونډه دائره شوه 

د کرنې، اوبولګولو او مالدارۍ وزارت د اراضۍ لوی رییس مولوي محمود مظلوم، د طبيعي سرچینو لوی رییس مولوي عبدالاحد خليل، د استملاک او بيا مېشتدنې عمومي رییس مولوي عبدالعلي عمري، د کدستر رییس مولوي سيد عبدالواحد هارون، د تصفيې رییس ملا ضياء الحق ضياء، د څړځايونو د تنظیم رییس سيد احمد خالد صاحبزاده، د اراضۍ ادارې تخنيکي او حقوقي څانګو سلاکارانو او يو شمېر کارکوونکو په شتون کې، د هېواد د شمالي ولايتونو د څړځايونو د تثبيت او د ستونزو د حل په موخه غونډه دائره شوه. 
په پيل کې د کرنې، اوبو لګولو او مالدارۍ وزارت د طبيعي سرچینو لوی رییس مولوي عبدالاحد خلیل وويل، چې د افغانستان اسلامي امارت د عدليې وزارت د کميسيون څخه د شمالي ولايتونو د څړځايونو د تثبت او په ياده موضوع باندې د خلکو د ستونزو د حل په موخه د اراضۍ او طبیعي سرچینو لوی رياستونو ته وړاندېزونه شوي چې په کې د هرې مرعي ځمکو سکېج، کروکي او څلور اړخه حدود معلومول،د هرې مرعي ځمکې کچه معلومول، د هرې مرعي ځمکې خپل اصلي حالت کې د پاتې کېدو کچه څرګنده ول،  د هرې مرعي ځمکې مزروعي کچه معلومول،په هره مرعي ځمکه کې د کرنې کيفيت په ډاګه کول، په هره مرعي ځمکه کې د هستوګنېزو کورونو شمېر او کچه معلومول، د هستوګنيزو تصرفاتو څخه پرته د نورو تصرفاتو اندازه او کيفيت په ډاګه کول او کمیسیون ته د يادو موضوعاتو راپور استول شامل دي.
ښاغلي خلیل زیاته کړه، د عدليې وزارت د وړانديزونو د تحقق په موخه او په شمالي ولايتونو کې د څړځايونو د تثبت او د خلکو ترمنځ د ستونزو د حل لپاره د طبيعي سرچینو لوی رياست او د څړځايونو د تنظیم رياست په ګډه يوه کړنلاره ترتيب کړې، چې پنځه فصلونه او دوڅلوېښت مادې لري.
ورپسې د څړځايونو د تنظیم رياست د انجمنونو د جوړولو مسؤل سید عباس قريشي د يادې کړنلارې د موضوعاتو په هکله په مفصله توګه معلومات وړاندې کړل.
ښاغلي قريشي د اراضۍ ریاست مسؤلینو او سلاکارانو څخه وغوښتل، چې په جوړه شوې کړنلاره کې خپل نظرونه او ړاندیزونه شریک کړي.
په همدې حال کې د کرنې وزارت د اراضۍ لوی رییس مولوي محمود مظلوم او د دغه ادارې سلاکارانو په خپل وار د يادې جوړه شوې کړنلارې د لاښه والي په پار خپل نظرونه او وړانديزونه شريک کړل.
نوموړو همدارنګه د ځمکوالۍ په برخه کې په بېلابېلو موضوعاتو لکه د شخصي او امارتي ځمکو د تفکيک، عامه او خاصه مرعي ځمکو د حدودو او په ځمکو کې د غیر مسؤلو اشخاصو د تصرف او نورو مواردو په هکله هم خبرې وکړې.
د يادونې ده، چې د يادو څړځايونو د تثبيت په موخه څو ورځې مخکې يو ټيم شمالي ولايتونو ته سفر کړی وو.