د فراه بالابلوک کې د یو چک ډېم رغنیزې چارې بشپړ او ګټې اخیستنې ته وسپارل شوه
۱۱ وری ۱۴۰۳ه.ش
۲۰ رَمَضانُ المُبارَک ۱۴۴۵ه.ق
د فراه دکرنې، اوبولګولو او مالدارۍ ریاست د ملګرو ملتونو پراختیایي ادارې په مالي او د رفاه اسلامي مؤسسې په تخنیکي همکارۍ ددې ولایت د بالابلوک ولسوالی بزګرانو ته د اسانتیاوو برابرولو په پار د اوبولګولو د یو چک ډېم رغنیزې چارې بشپړ او ګتې اخیستنې ته سپارلی دی.
دفراه ولایت دکرنې، اوبولګولو او مالدارۍ ریاست چارواکي وایي، چې یاد چک ډېم د بالابلوک ولسوالی د سیاه ځنګل په کلي کې جوړه شوې، چې ۷۰ متره اوږدوالی، ۵.۵ متره لوړوالی او د لسګونه مترمکعب اوبو د زېرمه کولو وړتیا لري.
د فراه ولایت د کرنې، اوبولګولو او مالدارۍ ریاست چارواکي وایي، چې ددې پروژې په پلي کېدو سره به د باران اوبه کنټرول شي او د ځمکې د سطحې پر اوبو به هم ښه اغېز ولري، ددې ترڅنګ د کاریزونو او څاګانو په اوبو به هم اغېز کوي، د کوچیانو مالونو ته هم اوبه چمتو کوي او د خاورې د تخریب مخه نیسي.
دا په داسې حال کې ده، چې دکرنې، اوبولګولو او مالدارۍ وزارت له خوا د هېواد په کچه په تولو ولایتونو کې د سلګونو چک ډېمونو رغنیزې چارې پیل شوي دي، چې ډېر ژر به یې رغنیزې چارې بشپړ او ګټې اخیستنې ته به وسپارل شي.
