ننګرهار کې د بڼوالۍ پراختیا او ستونزو حل په موخه د همغږۍ ناسته وشوه
د ننګرهار د کرنې، اوبو لګولو او مالدارۍ ریاست د احصایي او معلوماتو د تنظیم امر قاري سیلاب زکریا او دکرنیزو خدمتونو امر نعمت الله اکبري د اکشن اېډ مؤسسې له چارواکو سره د بڼوالۍ پراختیا، ستونزو او راتلونکی کې د ستروسو ترڅنګ د نورو باارزښته بوټو بڼوالۍ ترسره کولو په موخه د همغږۍ ناسته وکړه.
په دې ناسته کې د اکشن اېډ مؤسسې د کرنې د ودې، کلیو پراختیا، حلالو فصلونو او معشیت ته د لاسرسي پروژې مسؤل انجينر روح الله درویش وویل، داکشن اېډ مؤسسه د ننګرهار په ۱۱ ولسوالیو کې د سلګونه جریبه بڼوالۍ د ترسره کولو هوډ لري.
نوموړي وویل دوی د ستروسو ترڅنګ په هغو ولسوالیو کې چې نور با ارزښته بوټي ښه نتیجه ورکوي بڼوالو ته بڼوالي ترسره کوي.
ښاغلي درویش د کرنې ریاست مسولینو څخه د ولسوالیو په کچه محیطي شرایطو ته په کتو د ښو او غورو ورایټیو د معرفي کولو، بنوالو انتخاب او اړونده نورو برخو کې د همکارۍ غوښته وکړه.
په همدې حال کې د ننګرهار د کرنې، اوبو لګولو او مالدارۍ ریاست د احصایې او معلوماتو د تنظیم امر قاري سیلاب زکریا د یادې مؤسسې مسولینو څخه د شفتالو،آلوچو، زردالو او سرو املوکو د بڼوالۍ ترسره کولو وړاندیز ترڅنګ يي پدې برخه کې د هر راز همکارۍ ډاډ ورکړ.
