د لوګر محمدآغه کې سلګونه جریبه بڼونه جوړېږي
۶ وری ۱۴۰۳ه.ش
۱۵ رَمَضانُ المُبارَک ۱۴۴۵ه.ق
د لوګر ولایت دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې د خوړو خوندیتوب پروژې له لارې ددې ولایت د محمدآغې په ولسوالی کې د مڼو او بادامو بڼونو جوړولو په پار پر ۵۷۰ بزګرانو د بادامو او مڼو تصدیق شوي نیالګي وېشلي دي.
د لوګر دکرنې ریاست د چارواکو په خبره ددې پروګرام په ترڅ کې پر ۴۴۳ بزګرانو د بادامو ۷۳ زره او ۹۸۱ نیالګي او پر ۱۲۷ بزګرانو د مڼو ۲۱ زره او ۲۰۹ تصدیق شوي نیالګي وېشل شوي دي، چې په ترڅ کې یې ۵۷۰ جریبه د مڼو او بادامو نوي بڼونه جوړېږي.
دغه راز د یادو بڼونو د ښې روزنې په پار پر یادو بزګرانو د کیمیاوي سرو د وېش ترڅنګ دوی ته د بڼوالۍ په برخه کې روزنه هم ورکړل شوې ده.
دغه بڼونه په دې ولسوالی کې د بادامو او مڼو عصري بڼوالۍ دودولو او په ټوله کې د بڼوالۍ سکټور ودې او پراختیا په موخه جوړېږي.
