د هلمند مرکز لښکرګاه په ګډون څلورو ولسوالیو کې د سلګونه جریبه امارتي ځمکې د غصب مخه ونیول شوه

۲۰ کب ۱۴۰۲ه‍.ش
۲۹ شَعبان المُعَظّم ۱۴۴۵ه‍.ق
هلمند کې د امارتي ځمکو د غصب مخنیوی د کمپاین په دوام ددې ولایت مرکز لښکرګاه په ګډون مارجې، نهرسراج، ګرمسېر او  نوزاد ولسوالیو کې د شاخوا ٣٠٠٠ جریبه امارتي ځمکې د غصب مخه نیول شوې ده. 
د یاد کمپاین په ترڅ کې د هلمند په مرکز لښکرګاه کې د ترویج عمومي مدیر قاري مسلم او امنیتي مسؤلینو په همکارۍ د پاسپورت آمریت شاته هدیرې په سیمه کې یو شمېر کسانونو غوښتل دوکانونه جوړ کړي، همدارنګه د شپږمې حوزې اړوند کاریز سیمه کې هم غاصبینو غوښتل چې امارتي ملکیتونه غصب او په تجارتي بڼه یې واړوي او یاهم یاده ځمکه کرنې ته چمتو کړي، چې پر وخت یې د غصب مخنیوی شوی دی.
دغصب مخنیوی د پروسې په لړ کې د ګرمسېر ولسوالی ډېرو سیمه کې،  نوزاد ولسوالی مات پله ته څېرمه، نهرسراج ولسوالی د کڅو په سیمه کې د مارجې ولسوالی سیستاني، مېله بازار، قاسم بازار او تریخ ناور سیمو کې نږدې ٣٠٠٠ جریبه امارتي ځمکو د غصب مخنیوی شوی دی .
د یادولو وړ ده، چې د یا کمپاین پر مهال نږدې ١٢ تنه غاصبین او یو شمېر توکي او وسایط هم نیول شوي دي، چې اړونده عدلي او قضایي ادارو ته سپارل شوي دي.