هلمند کې د ځمکې غصب مخنیوي تخنیکي پلاوي غونډه دائره شوه

د هلمند ولایت د ځمکې د غصب مخنيوي او غصب شویو ځمکو د تثبیت تخنیکي پلاوي خپله ۱۰۰ مه نوبتي غونډه ترسره کړه.
په یاده غونډه کې د یادې کمېټې رییس مولوی نیاز محمد وهاج تر څنګ نورو غړو هم حضور درلود.
تخنیکي پلاوي په نننۍ ناسته کې پر بېلابېلو موضوعاتو بحث او خبرې وکړې او په اړه یې لازمې کړنې ترسره کړې.
په دې غونډه کې د تیرې غونډې د پریکړو په اړه د ترسره شویو کړنو راپور واورېدل شو، هغه موضوعات چې لا هم ورباندې اجرائت نه وو بشپړ شوي، مربوطه مسؤلینو ته یې په اړه لازمې سپارښتنې وشوې.
د هلمند ولایت د تخنیکي پلاوي په نننۍ ناسته کې په مرکز لښکرګاه او ولسوالیو کې د امارتي ځمکو د غصب مخنیوی او استرداد په اړه خبرې وشوې او په ګڼو موضوعاتو کې یې لازمې پرېکړې وشوې. تخنیکي پلاوي همدارنګه د عالیقدر امیرالمؤمنین حفظه الله (٣٧٦٣) ٢٤/ ٩/ ١٤٤٥ ګڼه فرمان او د سترې محکمې ١٤ ګڼه متحدالمال چې د ځمکو د غصب مخنیوی کمیسون لخوا راغلي دي ابلاغ کړل، په یاد فرمان او متحدالمال بحث او خبرې وشوې او د یادو هدایتونو د عملي تطبیق په موخه ورباندې ګډونوالو خپل نظرونه شریک کړل. 
تخنیکي پلاوي په یاده ناسته کې د بېلابېلو اشخاصو د ځمکو نسبتي دوسیې وارزولې د حل په اړه یې یو لړ اجرائت او سپارښتنې وکړې.
وروستیو کې د تخنیکي پلاوي لخوا په یو شمېر انفرادي عرایضو خبرې وشوې، په دې اړه پریکړه وشوه چې یاد موضوعات دې د ارتباط له حیثه مربوطه ادارو ته د حل په موخه ولېږدول شي.