د ننګرهار چپرهار کې د اوبولګولو د یوې پروژې چارې بشپړ او ګټې اخیستنې ته وسپارل شو
د ننګرهار دکرنې، اوبولګولو او مالدارۍ ریاست سره په همغږۍ د جاپان پلیټ فارم په مالي لګښت او د جاپان د بېړنیو مرستو مؤسسې په تخنیکي همکارۍ ددې ولایت د چپرهار ولسوالی کې د۱۷۱ زره ۹۷۱ ډالرو په لګښت د اوبولګولو د یوې پروژې چارې بشپړ او ګټې اخیستنې ته سپارلی دی.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې په دې پروژه کې د ۲۹،۳ کیلو متره په اوږدوالی د ګلدري کانال او فرعي لښتیو پاک کاري، یو عدد سربند، ۹۸۸ متره استنادي دېوال او د اوبو د کنټرول دوه دروازې پکي شاملې دي.
د ننګرهار دکرنې رییس وویل، چې ګلدري کانال کې ۲۴۳ کسانو ته د دوه میاشتو لپاره د کار زمینه هم برابره شوې وه.
ددې کانال په جوړولو سره ۱۳۸۵۰ جریبه کرنیزې ځمکې ته د اوبو رسولو زمینه برابره شوې ده.
ښاغلی محمد د تمویلوونکي ادارې او همکارۍ مؤسسې څخه د مننې ترڅنګ له دوی څخه وغوښتل، چې د ننګرهار ولایت په نورو سیمو کې دې هم ورته پروژې پلي کړي.
باید وویل شي، چې د جاپان د بېړنیو مرستو مؤسسي ۲۴۳ کاریګرو ته د کار په بدل کې او ۲۴۳ بېوزله او غریبو خلکو ته خوراکي او غیرخوراکي توکې ووېشلي، چې هره کڅوړه کې ۱۵۰ کیلو وړه، ۲۰ لېتره غوړي، ۵۰ کیلو غټې وریجې، ۲۰ کیلو بوره، دوه کیلو شین چای، ۱۵ کیلو لوبیا، ۱۳ کیلو مۍ، دوه کیلو مالګه او شپږ کلچې صابون ورکړل شو.
