د هلمند مارجه کې بڼوالو او بزګرانو ته د نباتي ناروغیو مخنیوی په اړه زده کړې ورکول کېږي
د هلمند ولایت د کرنې، اوبولګولو او مالدارۍ ریاست اړوند دمارجې ولسوالی د کرنیزو خدمتونو مدیریت لخوا د یادې ولسوالی بزګرو او بڼوالو ته د نباتي ناروغیو مخنیوی په اړه عامه پوهاوی ورکول کېږي.
په دې لړ کې بزګرو ته د بېلابېلو نباتي ناروغیو مخنیوی او د لایلم سلفر په نوم د حشراتو له منځه وړلو ترکیبي درملو دجوړولو او کارولو په اړه هر اړخیزې زده کړې ورکول کېږي.
د هلمند ولایت د کرنې ریاست هڅه کوي، چې د مرکز لښکرګاه په ګډون د بېلابېلو ولسوالیو بزګرانو ته د زده کړو دغه لړۍ روانه وساتي ترڅو د ځمکوالو د حاصلاتو په بهبود کې نوښت رامنځه شي.
