دکرنې وزارت پلاوي د لغمان والي سره وکتل
۱۵ سلواغه ۱۴۰۲ه.ش
۲۳ رَجَب المُرَجَّب ۱۴۴۵ ه.ق
دکرنې، اوبولګولو او مالدارۍ وزارت په کرونده کې د اوبو د تنظیم او د اوبولګولو د نویو ټکنالوژیو دودولو رییس مولوی معاذالله عادل په مشرۍ پلاوي لغمان ولایت ته دخپل سفر په ترڅ کې ددې ولایت له والي قاري زین العابدین عابد سره وکتل.
ددې کتنې په ترڅ کې، چې د لغمان دکرنې، اوبولګولو او مالدارۍ رییس الحاج مولوی محمد ولي محسن، د کرنې وزارت د د تدارکاتو ریاست استازی علي احمدي او د اوبولګولو د نویو لارو چارو دودلو آمر احمد خالد حفیظي هم حضور درلود¸ دکرنې وزارت په کرونده کې د اوبو د تنظیم او د اوبولګولو د نویو ټکنالوژیو دودولو رییس مولوی معاذالله عادل د لغمان په ولایت کې د پنځو منظور شویو چکډمونو په هکله د لغمان والي ته معلومات وړاندې کړل.
ښاغلی عادل وویل، چې دغه پنځه چکډمونه د کرنې وزارت د پراختیایي بودیجې له لارې ددې ولایت د علینګار، علیشنګ، دولت شاه، قرغیو او بادپښ ولسوالیو دعزت خېلو،شمکټ، دره زاري،زعفران او شاګولیانو کلیو کې جوړېږي.
په همدې حال کې د لغمان دکرنې، اوبولګولو او مالدارۍ رییس الحاج مولوی محمد ولي محسن وویل، چې یاد چکډیمونه د اسلامي امارت د ریاست الوزرا د ځانګړې حکم په اساس د استعجالیت له امله د واحدې سرچینې په ډول یې د دواطلبۍ او د قرارداد سپارلو پروسه پرمخ ځي.ښاغلی محسن د لغمان والي څخه د واحدې منبع داوطلبۍ پروسې لپاره د یو کمیټې د ټاکلو غوښتنه وکړه.
په ورته وخت کې د لغمان والي قاري زین العابدین عابد یاد پلاوي ته د چکډیمونو د پروژې دتطبیق په برخه کې د هر راز همکاریو ډاډ ورکړ او د داوطلبۍ پروسې لپاره یې د ولایت مقام، مستوفیت او کرنې ریاستونو څخه استازي وټاکل ترڅو د داوطلبۍ پروسه ترسره کړي.
