کندهار کې پر یوشمېر بزګرانو د شنوخونو د وېش ترڅنګ لسګونه بزګران روزل شوي
۱۵ سلواغه ۱۴۰۲ه.ش
۲۳ رَجَب المُرَجَّب ۱۴۴۵ ه.ق
د کندهار دکرنې، اوبولګولو او مالدارۍ ریاست د «ډیلټا» مؤسسې په همکارۍ ددې ولایت د پنجوايي ولسوالی پر یوشمېر مستحقو بزګرانو د شنوخونو د وېش ترڅنګ دوی سره په بېلابېلو برخو کې مرستې او همکارۍ کېږي.
بلخوا د کندهار دکرنې ریاست ددې ولایت دغورک په ولسوالی کې د «او.آر.ډي» مؤسسې په همکارۍ یوشمېر بزګرانو ته روزنیز پروګارم په لاره اچول شوې وه، چې په ترڅ کې یې یادو بزګرانو ته د غنمو د ناروغیو د مخنیوي او د غنمو کروندو ته د سرې ورکولو لارې چارې ښودل شوي دي.
ددې ترڅنګ یادو بزګرانو ته د حاصلاتو راټولولو او زېرمه کولو په موخه هم پوهاوی ورکړل شوي دي.
په همدې حال کې د کندهار دکرنې، اوبولګولو او مالدارۍ ریاست ددې ولایت د کوهکران څېړنیز فارم کې د انارو نیالګیو کېنولو چارې پیل کړي، چې په ترڅ کې یې د انارو نیالګیو لپاره د ځمکې چمتوکولو چارې پیل شوي دي.
یاد فارم چي د کندهار ولایت د کرنې ریاست یو څېړنیز فارم دی اوس مهال یې کارونه په منظم ډول روانې دي.
په دغه فارم کي په سلګونه ډوله انګور، لسګونه ډوله انار او هغه میوې چي د افغانستان په ټولو ولایتونو کي حاصلات ورکوي موجودې دي.
بلخوا دکندهار دکرنې ریاست د دې ولایت د میوند په ولسوالی کې لس جریبه ځمکه چې د یوشمېر کسانو له خوا غصب شوي و له غصب څخه خلاص او کرکیلي ته چمتو شوي دي.
د یادو کړنو او فعالیتونو ترڅنګ د کندهار دکرنې، اوبولګولو او مالدارۍ ریاست د حیواني روغتیا او مالدارۍ آمریت مسلکي کارکوونکو د کندهار هرات د لویې لارې هوټلونو، قصابیو او حیواني کلینیکونو او درمل پلورنځیو څخه هم څارنه کړې، چې په ترڅ کې یې اړوندو چارواکو ته لازمې سپارښتنې وشوې.
