ننګرهار کې د چرګانو روزنې سکټور د پیاوړتیا په پار د همغږۍ غونډه دائره شوه

د کرنې،اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني ننګرهار ولایت ته د خپل سفر په ترڅ کې په دې ولایت کې د یو ورځنیو چرګوړو د تولید زیاتوالی، د چرګانو روزنې د سکټور پیاوړتیا او ددې سکټور پر وړاندې د شته ستونزو او ننګونو د حلولو په موخه د ننګرهار ولایت د چرګانو روزنې فارم لرونکو، د چرګانو روزنې ټولنې او د دانو تولیدوونکو فابریکو له چارواکو سره د همغږۍ غونډه دائره کړه.
په دې غونډه کې د چرګانو د دانو تولیدوونکو په استازیتوب حاجي ګل مراد عرب د چرګانو روزنې سکټور ته د ښې پاملرنې په پار دکرنې وزارت او د ننګرهار دکرنې ریاست هلې ځلې وستایلې او په ننګرهار کې د چرګانو روزنې په سکتور کې د ستونزو، لاسته راوړنو او راتلونکو پلانونو په تړاو یې معلومات وړاندې کړل.
عرب په ننګرهار کې د چرګانو سکتور پیاوړتیا او د یو ورځنیو چرګوړو تولید په موخه دځمکو سربېره د خامو موادو، برېښنا، درملو،  واکسینونو او نورو برخو کې د ستونزو یادونه وکړه.
ګلمراد عرب وویل که دوی ته د پانګونې زمینه برابره شي د یورځنیو چرګوړو تولید به ډېر کړي. 
په همدې حال کې د کرنې وزارت د کرنې او مالدارۍ مرستیال مولوي صدراعظم عثماني پانګوالو ته د چرګانو روزنې سکتور پیاوړتیا او ستونزو حل ژمنه وکړه.
ښاغلي عثماني وویل، چې د افغانستان اسلامي امارت د ځان بسېایني په موخه په تولو برخو کې کار کوي.
ښآغلی عثمامي وویل، چې د کرنې وزارت ددې سکتور د پیاوړتیا لپاره د دوه کیلو څخه د زیات وزن لرونکو چرګانو واردات او یخچالې غوښي بندکړل، ګمرکې تعرفي لوړې شوې، او په کور دننه د پانګونې لپاره اسانتیاوي برابرې شوي دي.
دکرنې او مالداۍ مرستیال  پانګوالو څخه وغوښتل، ترڅو  د یو ورځنیو چرګوړو د تولید زیات او بریډر فارمونو جوړولو کې پانګونه وکړي، ترڅو د ورځنیو چرګوړو په برخه کې هم پر ځان بسیا شو.
په همدې حال کې، د پانګوالو له لورې د کرنې او مالدارۍ مرستیال ته پدې برخه کې دپانګونې او پیاوړتیا ژمنې وشوې.