ننګرهار کې د کب روزنې د ترویج په پار هڅې؛ د کانال شرکت کبان بازار ته وړاندې شو
۱۴ سلواغه ۱۴۰۲ه.ش
۲۲ رَجَب المُرَجَّب ۱۴۴۵ ه.ق
ننګرهار کې د کب روزنې چارې او فارمونه د ودې په حال کې دي او په دې وروستیو کې په دغه ولایت کې د کبانو روزنې ډېر شمېر فارمونه جوړ شوي دي.
د کرنې، اوبولګولو او مالدارۍ وزارت په دې ولایت کې د کب روزنې د ترویج او دودولو په پار د کب روزنې د ګڼ شمېر فارمونو د جوړولو ترڅنګ ددې ولایت له کب روزونکو سره هر اړخیزې تخنیکي او مالي مرستې او همکارۍ کړي دي او ترڅنګ یې په دې برخه کې خصوصي سکټور ته د پانکونې زمینه هم برابره کړې ده.
په ننګرهار کې د کب روزنې ترویج او پراختیا په پار د ننګرهار دکانال ریاست د هډې فارم اړوند ثمرخېلو سيمه کې په لس جريبه ځمکې د کبانو روزنې او ساتنې اته حوضونه جوړ کړي دي، چې په ددغو حوضونو کې څلور ډوله کبان روزل کېږي، چې اوسمهال خرڅلاو ته چمتو شوي دي.
د ننګرهار کانال شرکت د چارواکو په خبره د ثمرخېلو د کبانو له حوضونو څخه یې ۲۲۲ کیلو ګرامه کبان خرڅ کړي دي، چې له یادو حوضونو څخه به نږدې لس ټنه کبان بازار ته وړاندې شي.
خلکو ته د کاري فرصتونو برابرولو او د کورنیو اقتصادي پیاوړتیا په پار په پام کې ده، چې په دې ولایت کې د کبانو ډېر شمېر فارمونه جوړ شي.
