د پکتیکا دکرنې رییس د کډوالۍ نړیوالې ادارې له چارواکو سره وکتل
۱ سلواغه ۱۴۰۲ه.ش
۹ رَجَب المُرَجَّب ۱۴۴۵ ه.ق
د پکتیکا دکرنې، اوبولګولو او مالدارۍ رییس مولوی شېر محمد ذبیح د خپل کار په دفتر کې د کډوالۍ نړیوالۍ ادارې «آی او ام» له سیمه ییزو چارواکو سره په کتنه کې ددې ولایت دکرنې پر پراختیا او د بزګرانو پر ملاتړ خبرې اترې وکړې.
ددې کتنې په ترڅ کې د کډوالۍ نړیوالې ادارې سیمه ییزو چارواکو دکرنې او مالدارۍ په برخه کې ددې ادارې د فعالیتونو او پلانونو په هکله د پکتیکا دکرنې رییس ته معلومات وړاندې کړل.
یادو چارواکو د پکتیکا دکرنې رییس سره ژمنه وکړه، چې په راتلونکي کې به د پکتیکا بزګرانو لپاره ځانګړې پاملرنه کوي.
په همدې حال کې د پکتیکا دکرنې رییس د کډوالۍ نړیوالې ادارې له فعالیتونو څخه د مننې ترڅنګ دوی سره د هرراز همکاریو ژمنه وکړه.
