پکتیکا کې پر زرګونو بزګرانو د غنمو اصلاح شوي تخمونو او کیمیاوي سرو وېش لړۍ پیل شو
۱۳ مرغومې ۱۴۰۲ه.ش
۲۱ جُمَادَى الثاني ۱۴۴۵ ه.ق
د پکتیکا ولایت دکرنې، اوبولګولو او مالدارۍ ریاست د ملګرو ملتونو د خوړو اوکرنې ادارې په مالي او د افغانستان لپاره د ناروې کمېټې په تخنیکي همکارۍ ددې ولایت د مرکز شرنې په ګډون په اتو ولسوالیو کې پر ۲۸۰۰ مستحقو بزګرانو د غنمو د اصلاح شوي تخمونو او کیمیاوي سرو وېش لړۍ پیل کړی دی.
دغه مرستې د پکتیکا دکرنې ریاست، په پکتیکا کې د ملګرو متلونو دخوړو او کرنې ادارې مسوول، د افغانستان لپاره د ناروې کمېټې مسؤلینو، یوشمېر سیمه ییزو چارواکو په شتون کې پیل شو.
باید وویل شي، چې یاد بزګران د سروې له مخې اړمن پېژندل شوی وو چې د مرستو تر څنګ ورته د کرکیلې اړوند لازمې لارښوونې هم شوی دی، په یادو مرستو کې هر بزګر ته ۵۰ کیلو ګرامه د غنمو اصلاح شوی تخم ۵۰ کیلو توره کېمیاوي سره او ۵۰ کیلو یوریا سپینه سره ورکړل شوي دي.
د دې مرستې د وېش موخه د بېوزله بزګرانو ملاتړ او په ټوله کې د دوی د کرنیزو محصولاتو زیاتوالی له لارې د دوی عوایدو زیاتوالي ته زمینه برابرول دي.
