کندهار کې ٥٨٨ اړمنو کورنیو ته د هګیو چرګانو واړه فارمونه جوړ شول

۱۱ مرغومې ۱۴۰۲ه‍.ش
۱۹ جُمَادَى الثاني ۱۴۴۵ ه‍.ق
د  کندهار ولایت د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې په مالي او د «اکټیډ» مؤسسې په تخنیکي همکارۍ ددې ولایت ٥٨٨ تنو هغه مېرمنو  ته چې د کورنۍ د ګټي وټې مسولیت ور تر غاړي دي د دوی د اقتصادي پیاوړتیا په پار دوی ته د چرګانو واړه فارمونه جوړ شول. 
د کندهار ولایت دکرنې، اوبولګولو او مالدارۍ رییس الحاج مولوی فضل الباري فضلي وویل، چې هرې ګټي اخیستونکې  ته ۳۰ قطعې کورني چرګان، ۵۰ کیلوګرامه د چرګانو خوراکه او د چرګانو روزنې اړونده توکي ورکړل شوي دي.
ښاغلی فضلي وویل، چې د چرګانو د ورکړې موخه دا ده ترڅو په کور دننه بېوزله کورنیو ته د کار زمینه هم برابره شي؛  ترڅو د خوړو خوندیتوب رامنځته او کورنۍ پر ځان بسیا شي.
دغه راز یادو کورنیو ته د چرګانو پاللو، ناروغیو مخنیوي  د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.