هلمند کې د انګورو عصري بڼوالۍ دودولو په پار هڅې
٣٠ لیندۍ ۱۴۰۲ه.ش
٨ جُمَادَى الثاني ۱۴۴۵ ه.ق
دهلمند ولایت کې دعصري بڼوالۍ د پراختیا په موخه د کرنې، اوبولګولو او مالدراۍ ریاست د هلوځلو په دوام، ددې ولایت د مارجې په ولسوالی کې پنځه بابه بڼونو ته د «ټي ټریلس» په سیسټم د انګوري بڼونو پایې نصب شوي دي.
دغه پروسه د مارجې ولسوالی د کرنیزو چوپړونو مدیریت له لوري د افغان کډوالو سره د ډنمارک کمیټې په مالي مرسته ترسره شوې ده، چې د انګورو په حاصلاتو کې به یې د پام وړ زیاتوالی راشي.
په دې برنامه کې د کرنې ریاست له خوا د سیمې بڼوالو ته د نویو جوړیدونکو بڼو لپاره د نقشې، ډیزاین او همدا رنګه د (ټي ټریلس) په سیستم د انګوري بڼونو جوړولو لارې چارې په عملي بڼه ښودل شوي دي.
د هلمند ولایت د کرنې ریاست د محصولاتو د اصلاح او ځواکمنتیا په پار بڼوالو او بزګرانو لپاره بېلابېلې برنامې په پام کې نیولي دي تر څو د مشروع کرکېلي له لارې خپل اقتصاد ته وده ورکړي.
