د ننګرهار کانال شرکت ستونزې هوارېږي 

د کرنې، اوابولګولو او مالدارۍ  وزارت د کرنې او مالدارۍ مرستیال مولوي صدراعظم عثماني په مشرۍ د څلورو وزارتونو مرستیالانو د ننګرهار کانال شرکت دستونزو او ننګونو هوارولو په پار د یاد شرکت له بېلابېلو برخو څخه لېدنه کړه.
 د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني په مشرۍ د دې لیدنې پر مهال د مالیې، اقتصاد، صنعت او سوداګرۍ، انرژۍ او اوبو وزارتونو مرستیالانو او سلاکارانو شتون درلود، چې په ترڅ کې یې د ننګرهار کانال شرکت له  دفترونه، زیتونو فابرېکې، ترکاڼۍ فابرېکې، مالدارۍ فارم، ستروس او زیتونو بڼونو، د مالدارۍ ویجاړ شوی فارم، د اوبو فرعي کانالونه او نور برخې له نږدې ولېدلې. 
د کرنې او مالدارۍ مرستیال مولوي صدراعظم عثماني او ور سره مل پلاوی د برېښنا دکمښت ستونزې، زیتونو فابریکه، ترکاڼۍ، مالدارۍ، ستروس، زیتونو بڼونو، اوبو سیستمونه او نور په پښو درول د ننګرهار کانال په سیمه کې د پانګونې لپاره د کورنیو او بهرنیو پانګوالو او صنعتکارانو هڅول او ددې کانال د اقتصادي او مالي ستونزو د حل په اړه نظریات تبادله او لازم تدابیر ونیول شول.
دا لیدنه په داسې حال کې تر سره کېږي، چې موده مخکې د کرنې په وزارت کې د ننګرهار کانال شرکت چارو ته د رسېدنې په پار غونډه دائره شوې وه، چې
په ترڅ کې یې د ننګرهار کانال شرکت د برېښنا د کمښت د ستونزو د هواري، د ننګرهار کانال په سیمه کې د پانګونې لپاره د کورنیو او بهرنیو پانګوالو او صنعتکارانو د هڅولو او د دغه شرکت د اقتصادي او مالي ستونزو د حل په اړه بحث او د نظرونو تبادله وشوه.