د هلمند سنګین کې یوشمېر بزګران وروزل شول
دهلمند ولایت د کرنې، اوبولګولو او مالدارۍ ریاست اړوند د سنګین ولسوالی د کرنیزو خدمتونو مدیریت لخوا، د بشري خیریه مؤسسې په مالي همکارۍ ٥٠ تنو کرونده ګرو ته له شنو خونو څخه د ګټې اخیستنې په برخه کې روزنه ورکړل شوه.
په دې روزنیز پروګرام کې په شنو خونو کې د موسمي نباتاتو د کرنې او روزنې په اړه بزګرو ته پوهاوی ورکړل شو ترڅو په کم لګښت زیات او پر وخت حاصلات لاسته راوړي.
دغه زده کړې هغو بزګرو ته په لاره اچول شوې وه، چې په دې وروستیو کې ورته پخپلو ځمکو کې شنې خونې جوړې شوي او تر څنګ یې د اړتیا وړ تخمونه او کرنیز توکي ترلاسه کړي دي.
د هلمند د کرنې اداره په دې ولایت کې د کرنیزو محصولاتو اصلاح او پیاوړتیا په موخه د بېلابېلو برنامو له لارې د بزګرو لاسنیوی کوي ترڅو هغوۍ وهڅېږي، چې د مشروع کرکېلي له لارې خپل اقتصاد پیاوړي کړي.
