د هلمند دوو ولسوالیو کې لسګونو اړمنو کورنیو سره د چرګانو د خوراکي توکو مرسته وشوه
١۳ لیندۍ ۱۴۰۲ه.ش
۲۱جُمَادَى الأول ۱۴۴۵ ه.ق
د هلمند ولایت د کرنې، اوبولګولو او مالدارۍ ریاست لخوا، له افغان کډوالو سره د مرستې لپاره د ډنمارک کمیټې (ډاکار) مؤسسې په همکارۍ ددې ولایت په مارجې او ناوې ولسوالیو کې لسګونو بې وزله، او اړمنو کورنیو ته د دوی د کورني اقتصاد د پیاوړتیا په پار د هګیو چرګانو واړه فارمونه جوړ شوي دي، چې په تعقیب یې پر یادو کورنیو د چرګانو خوراکي توکي هم ووېشل شول.
د دې مرستې په لړکې د هلمند د مارجې ولسوالی٥٠ او ناوې ولسوالی ٤٧ کورنيو ته د هګۍ ورکوونکو چرګانو لپاره خوراکه ووېشل شوه.
د یادولو وړ ده، چې همدغو کورنیو ته تر دې وړاندې هرې کورنۍ ته ۳۰ هګې ورکوونکي چرګان، د چرګانو معياري خوراکه، د دانې خوړولو لوښې، د اوبو خوړلو لوښې او نور توکي ورکړل شوي وو.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله کورنیو اقتصادي ودې او مېرمتو ته په کور دننه د کار زمینه برابرول دي.
