د ننګرهار لعلپور کې د کانال او سربند جوړولو چارې بشپړ او ګټې اخیستنې ته وسپارل شو

د ننګرهار د کرنې،  اوبولګولو او مالدارۍ ریاست د ملګرو ملتونو پراختیایي ادارې په مالي او د سولې بنسټ پروژې په تخنکي همکارۍ ددې ولایت د لعلپورې په ولسوالی کې د اوبولګولو د یوې پروژې رغنیزې چارې بشپړ او ګټې اخیستنې ته سپارلی دی.
 د ننګرهار دکرنې، اوبولګولو او مالدارۍ رییس مولوی عبدالستار محمد وویل، چې د لعلپورې په ولسوالی کې د ٧٣زره او٤٠٠ ډالرو په ارزښت د یو  کانال او سربند د جوړیدو چارې بشپړ او ګټې اخیستنې ته سپارل شوی دی.
د ننګرهار دکرنې رییس وویل، چې په دې پروژه کې د ۲۰۵ مترو په اوږدوالي کانال ، ۱۰۰ متره استنادي دېوال جوړ شوي او دغه راز  ۱۷۵متره د کانال سر پت شوي او د دوه متره او ۳۰ سانتي مترو په پېړوالې د تیږو فرش لګول شوي او دوه عدده د اوبو کنټرول دروازې هم پکې جوړ شوي دي.
د ننګرهار دکرنې رییس وویل، چې ددې پروژې په بشپړېدو سره ۱۵۰۰جریبه کرنیزه  ځمکه  خړوبه او ٥٠٠ کورنۍ به ترې ګټه پورته کړي او ترڅنګ یې زرګونو خلکوته به د کار زمینه هم برابره شي.
د مولوی عبدالستار محمد په خبره  ددې پروژې په رغینزو چارو کې ٣٥  تر ٤٠ فني او غیر فني کاریګرو ته د کار زمینه هم برابره شوې وه.
په همدې حال کې د سیمې اوسیدونکو د یاد کانال په جوړیدو خوښي وښوده او دننګرهارد کرنې، اوبولګولو او مالدارۍ ریاست او پروژی له مسولینو څخه مننه وکړه.
 باید وویل شي، چې د سولې بنسټ پروژه د کوکنارو یوه بدیله پروژه ده، چې دکانالونو جوړولو ترڅنګ د بڼوالۍ، شنوخونو جوړولو، کرنیزو وسایلو او ګڼو نورو برخو کې د بزګرانو لاسنېوی کوي.