ننګرهار کې د بڼوالۍ د پراختیا په پار هڅې؛ ۳۰۰ جریبه نوې بڼونه جوړېږي

۲ لیندۍ ۱۴۰۲ه‍.ش
۱۰جُمَادَى الأول ۱۴۴۵ ه‍.ق
د ننګرهار د کرنې، اوبولګولو او مالدارۍ ریاست سره په همغږۍ د سولې بنسټ د ( کرنې د ودی او کلیو پراختیا)  پروژې له لورې په لسو ولسوالیو سرخ رود، چپرهار، شېرزاد، خوږیاڼو، رودات، کوټ، اچین، مومندره، لعلپوره او دره نور کې د مني موسم بڼوالې پیل کړه.
د ننګرهار د کرنې، اوبولګولو اومالدارۍ رییس مولوي عبدالستار محمد وویل دسولې بنسټ له لورې په ننګرهار کې پر ۳۰۰ جریبه ځمکه د ستروسو، الوچو، ناک او مڼو بڼونو جوړولو چارې پیل شوي.
محمد زیاته کړه په یادو بڼونو کې ۲۵۰ جریبه عادي او ۵۰ جریبه متراکم بڼونه دي، چې هغو بڼوالو ته به جوړ شي چې د بڼوالۍ سره علاقه او لېوالتیا ولري.
دغه راز د ننګرها د کرنې رییس وویل چې د سولې بنسټ د بڼوالۍ ترڅنګ د شنو خونو جوړولو، د بڼوالۍ کڅوړو وېش، اصلاح شوي تخمونو، کیمیاوي سرو او کرنیزو وسایلو په وېش کې هم له بزګرانو سره مرستې کوي.
وړاندې تر دې هم د سولې بنسټ د بزګرانو او بڼوالو سره دبڼوالۍ او اصلاح شوي تخمونو ترویج ترڅنګ په مختلفو برخو کې مرستې کړي دي.