اروزګان کې پر زرګونو بزګرانو د غنمو اصلاح شویو تخمونو او کیمیاوي سرو وېش لړۍ پیل شو
١٣ لړم ۱۴۰۲ه.ش
٢٠ ربیعالثاني ۱۴۴۵ ه.ق
د اروزګان ولایت دکرنې، اوبولګولو او مالدارۍ ریاست د ملګرو ملتونو د خوړو اوکرنې ادارې په مالي ملاتړ ددې ولایت پر اته زره مستحقو بزګرانو د غنمو د اصلاح شویو تخمونو او کيمياوي سرو وېش لړۍ پیل کړی دی.
ددغو مرستو د وېش په پيل غونډه کې د اروزګان والي الحاج مولوي محمد علي جان احمد، د کرنې رییس الحاج مولوي عبدالصمد مقبول او یوشمېر سیمه ییزو چارواکو ګډون کړي و.
د چارواکو په خبره ددغې پروسې له لارې د دې ولایت په مرکز او یوشمېر ولسوالیو پر اته زره مستحقو بزګرو د غنمو اصلاح شوي تخمونه او کیمیاوي سرې وېشل کېږي.
باید وویل شی یاد بزګران د سروې له مخې اړمن پېژندل شوی وو چې د مرستو تر څنګ ورته د کرکیلې اړوند لازمې لارښوونې هم شوی دی،په یادو مرستو کې هر بزګر ته ۵۰ کیلو ګرامه د غنمو اصلاح شوی تخم ۵۰ کیلو توره کېمیاوي سره او ۵۰ کیلو یوریا سپینه سره وېشل کېږي.
د دې مرستې د وېش موخه د بېوزله بزګرانو ملاتړ او په ټوله کې د دوی د کرنیزو محصولاتو زیاتوالی له لارې د دوی عوایدو زیاتوالي ته زمینه برابرول دي.
