لغمان کې له ۲۴۵ کورنیو سره د اړینو توکو مرسته وشوه

٢۶ وږي ۱۴۰۲ه‍.ش
۱ ربیع‌الاول ۱۴۴۵ه‍.ق
د لغمان دکرنې، اوبولګولو او مالدارۍ ریاست د «اې،ډي،اې» مؤسسې به تخنیکي همکارۍ ددې ولایت د علیشنګ او علینګار ولسوالیو پر ۲۴۵ کورنیو خوراکي او غیر خوراکي توکې وېشلي دي.
د لغمان دکرنې ریاست چارواکي وایي، چې ددې ولایت د علیشنګ ولسوالی د میاصاحب درې، دامان، شکرمان او کچیان کلیو او دغه راز د علینګار ولسوالی د پنچ کوړې، عظم کلاء او د دین دکانونو کلي پر ۲۴۵ کورنیو د دوی د اړتیا وړ توکي وېشل شوي دي.
ددې مرستې په وېش غونډه کې د لغمان دکرنې رییس مولوی محمدولي محسن ترڅنګ یوشمېر نورو سیمه ییزو چارواکو هم شتون درلود.
ښاغلی محسن په خپلو خبرو کې له یادې مؤسسې څخه د مننې ترڅنګ ددې مؤسسې له چارواکو وغوښتل، چې د مرستې په وېش کې روڼتیا په پام کې ونیسي. هغه دغه راز د دې مؤسسې کارکوونکو ته د هرراز همکاریو ډاډ ورکړ.
په دغه وېشل شویوتو کې هرې کورنۍ ته ۱۰۰ کیلوګرام اوړه، لس لیټره عوړي، اوه کیلوګرامه لوبیا، ۲۰ کیلوګرامه وریجې، یوکیلو مالګه او په غیر خوراکي توکو کې د حفظ الصحې اړونده توکي له صابون، شامپو، د غاښونو کریم، ځان پاک، کوزه، بوشکې او د جامو مينځلو توکي ورکړل شوي دي.
ددې مرستې موخه د بېوزله کورنیو ملاتړ او په ټوله کې د خوړو خوندیتوب رامنځته کول دي.