ننګرهار کې یوشمېر بزګران وروزل شول

۲۲ وږي ۱۴۰۲ه‍.ش
۲۷ صَفَرُ المُظَفَّر ۱۴۴۵ه‍.ق
د ننګرهار د کرنې، اوبولګولو او مالدارۍ ریاست سره په همغږۍ د سولې ریښې ادارې له لورې ۸۰ تنو کروندګرو او بڼوالو ته د کروندې د ورځې تر عنوان لاندې روزنه ورکړل شوه.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې د سولې ریښې اداره یا «روټس اف پیس» په روداتو او کوټ ولسوالیو کې ۸۰ تنو بزګرانو او بڼوالو ته په شنو خونو کې د ځمکې اماده کولو،  تخمونو کرلو د شنو خونو کې د کروندو ښه مدیریت کولو، په بڼونو کې د ښاخه برې، د متراکمو بڼونو ترویجولو  اوبولګولو، سرې ورکولو او په متراکمو بڼونو کې د څانګو تړلو په برخه کې بشپړ معلومات ورکړل شول.
دغه راز په شاړو ځمکو کې بڼوالۍ ترسره کولو،  دبڼونو څخه سالمه ګټه اخیستنه، د هرزه وښو کنټرول، کیمیاوي درملو استعمالول، د ناروغیو مخنیوی،  د ښه تخم انتخابولو او ګڼو نورو برخو کې ورته د متخصصینو له لورې روزنه ورکړل شوه.
د روټس اف پیس برنامه چې د نشه یې توکو یوه بدیله پروژه ده د بڼوالې ترڅنګ د کرنې په مختلفو برخو کې د بزګرانو لاسنیوي کوي.