د مالدارۍ سکټور خوندیتوب په پار هڅې؛ پکتیا کې د وټرنرۍ کلینیک ګټې اخیستنې ته وسپارل شو
د پکتیا دکرنې، اوبولګولو او مالدارۍ ریاست چارواکي وایي، چې په دې ولایت کې مالدارانو ته د چوپرړتیاوو وړاندې کولو او په ټوله کې د مالدارۍ سکټور د ودې او خوندیتوب د هلوځلو په دوام د کرنې د پراختیا نړیوال صندوق په مالي او د افغانستان لپاره د هالنډ کمېټې په تخنیکي همکارۍ ددې ولایت میرزکې ولسوالی کې د څآرویو کلینیک جوړ او ګټې اخیستنې ته سپارلی دی.
ددې کلینیک په پرانیست غونډه کې، د میرزکې ولسوال الحاج مولوي عبدالرحمن حبیبي، مرستیال ولسوال خالد سجاد، د مالدارۍ آمر قاري نورالله، ددې ولسوالی د کرنیزو چارو او مالدارۍ مدیر ذبیح الله ایوبي، قومي مشرانو، مالدارانو او د افغانستان لپاره د هالنډ کمېټې استازو او یوشمېر نورو چارواکو ګډون درلود.
د پکتیا دکرنې ریاست وویل، چې یو کس ته د شپږو میاشتو لپاره د مالدارۍ او وترنرۍ خدمتونو په برخه کې روزنه هم ورکړل شوې ده.
د پکتیا دکرنې ریاست چارواکي دغه راز وویل، چې د یاد کلینیک لپاره اړینې توکي هم ورکړل شوې، ترڅو مالدارانو ته ښه او بهتره خدمات وړاندې کړي.
