ننګرهار کې ۱۵۰۰ اړمنو کورنیو ته د هګیو چرګانو واړه فارمونه جوړېږي
د ننګرهار د کرنې، اوبولګولو او مالدارۍ ریاست په هڅو د ننګرهار په ٣ ولسوالیو سرخ رود، بټي کوټ او کامې کې د اکشن آیډ مؤسسې په تخنیکي همکارۍ او د ملګرو ملتونو د کرنې او خوړو ادارې په مالي لګښت ۱۵۰۰ تنو هغه مېرمنو ته چې د کورنۍ د د نفقې پیداکولو مسولیت ور تر غاړي دي، د دوی د اقتصادي پیاوړتیا په پار دوی ته د چرګانو واړه فارمونه جوړیږي.
د ننګرهار دکرنې، اوبولګولو او مالدارۍ رییس مولوي عبدالستار محمد وویل چې هرې ګټي اخیستونکې ته به ۳۰ قطعې کورني چرګان، ۱۵۰ کیلو د چرګانو دانه، مرغانچي وسایل، ابخوري او دانه خوري هم ورکول کېږي.
محمد وویل د چرګانو د ورکړي موخه دا ده ترڅو په کور دننه بېوزله کورنیو ته د کار زمینه هم برابره شي؛ ترڅو د خوړو خوندیتوب رامنځته او کورنۍ پر ځان بسیا شي.
دغه راز یادو کورنیو ته د چرګانو پاللو، ناروغیو مخنیوي د واکسینونو تطبیق کولو او ګڼو نورو برخو کې روزنه هم ورکول کېږي.
وړاندې تردي هم اکشن آیډ موسسئ په ننګرهار ولایت کې سلګونو میرمنو ته د هګیو چرګان، چرګانو دانه او چرګانو اړوند وسایل ورکړیدي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.
