د کورنیو اقتصادي پیاوړتیا په پارهڅې؛ کونړ کې ۱۰۱۴ اړمنو کورنیو ته د هګیو چرګانو واړه فارمونه جوړ شول

۸ وږی ۱۴۰۲ه‍.ش
۱۳ صَفَرُ المُظَفَّر ۱۴۴۵ه‍.ق
د  کونړ د کرنې، اوبولګولو او مالدارۍ ریاست په هڅو د کونړ په دوو ولسوالیو  چپه دره او غازي آباد  کې د «ای.اچ.اف» مؤسسې په مالي او د «اي.ډبلیو.آر.او» مؤسسې په تخنیکي همکارۍ ۱۰۱۴  تنو هغه مېرمنو  ته چې د کورنۍ د ګټي وټې مسولیت ور تر غاړي دي د دوی د اقتصادي پیاوړتیا په پار دوی ته د چرګانو واړه فارمونه جوړ شول. 
د کونړ دکرنې، اوبولګولو او مالدارۍ رییس مولوي شېر آقا (پیر حبیب الرحمن) په خبره هرې ګټي اخیستونکې  ته ۳۰ قطعې کورني چرګان،۱۵۰  کیلو د چرګانو دانه ، څلور ابخوري او دانه خوري ورکړل شوي دي   .
د کونړ دکرنې رییس وویل، چې د چرګانو د ورکړي موخه دا ده ترڅو په کور دننه بېوزله کورنیو ته د کار زمینه هم برابره شي؛  ترڅو د خوړو خوندیتوب رامنځته او کورنۍ پر ځان بسیا شي.
دغه راز یادو کورنیو ته د چرګانو پاللو،  ناروغیو مخنیوي  د واکسینونو تطبیق کولو او ګڼو نورو برخو کې روزنه هم ورکول کېږي.
ددغو مرستو موخه په دې ولایت کې د چرګانو روزنې صنعت ته پیاوړتیا ورکول او د بېوزله او کونډو مېرمنو اقتصادي ودې ته په کور دننه زمینه برابرول دي.