دکرنې وزارت د ځمکو چارو ریاست اړوندو څانګو کې د ښې همغږۍ په پار غونډه دائره شوه
۲۵ زمری ۱۴۰۲ه.ش
٢۹ مُحَرَّمُ الحَرام ۱۴۴۵ه.ق
په هغه غونډه کې چې د ځمکو رياست لوی رییس ملا عبدالرحمن رحماني په مشرۍ جوړه شوې وه د استملاک او بیا مېشتدنې او د جیودیزۍ او کدستر عمومي ریاستونو په ګډون د دغه څانګو تر چتر لاندې ریاستونو د کابل ولايت د اراضي ریاست د حفظ اومراقبت، حاضرۍ او د معلوماتي تکنالوژۍ څانګو مسوولین هم ګډون درلود.
د اراضۍ ریاست د جیودیزۍ او کدستر عمومي رییس مولوي سعید الرحمن مظهري او د استملاک او بیا مېشتدنې عمومي رییس مولوي عبدالعلي عمري په خپل وار خپل د څانګو وړاندیزونه او ستونزې د اراضۍ ریاست له مشرتابه سره شریکې کړې.
د یادو ریاستونو مسوولين په خپلو څانګو کې د پرنټرونو او پلاټرونو د رنګونو نشتون، نور متقاضي اداراتو ته د نقشو چاپ، د غیر رسمي ښاري سيمو د ثبت ریاست چې کارونه يې تر اوسه په ټپه ولاړ دي، همدارنګه د یو شمېر کارکوونکو اضافه کاري، د نوي ګمارل شوي کارکوونکو لپاره د هېواد په زونونو کی د ظرفیت د لوړوالي په پار روزنیز ورکشاپونه، د تصفیې ریاست کارکوونکو ته د دفترونو نشتوالۍ او په ولاياتو کې په تخنیکي آرشيفونو کې د اسنادو بررسي يې د دغو څانګو له ستونزو وبلل.
ورپسې د اراضی ریاست لوی رئیس ښاغلۍ ملا عبدالرحمن رحماني د ریاستونو د مسوولینو د خبرو له اورېدو وروسته د څانګو له مسوولينو څخه وغوښتل ترڅو خپل وړانديزونه دې په رسمي بڼه د اراضی ریاست مقام ته وړاندې کړي همدارنګه د ځمکو رياست مشر د عمومي رياستونو له مسوولینو وغوښتل تر څو په تخنیکي آرشيفونو کې د اسنادو د بررسئ او د نوي کمارل شوي کارکوونکو د ظرفيت لوړولو په موخه دې یو موظف هیئت د هېواد زونونو او ولاياتو ته واستول شي.
ښاغلي رحماني زیاته کړه، په هغو څانګو کې چې تر اوسه بستونه یې خالي پاتې دي نو ژر تر ژره دې مسلکي او تجربه لرونکي کارکوونکي ورته پېشنهاد او په دغو بستونو کې په دنده وګمارل شي.
په پای کې د اراضۍ رياست مشرتابه د دغه رياست ټولو مسوولينو ته لازمې لارښوونې وکړې او له هغوی څخه یې وغوښتل تر څو د خپلو څانګو په ټولو برخو کې په جدي توګه هڅې وکړي.
