لغمان کې د ځنګلونو خوندیتوب په پار هڅې
٢١ زمری ۱۴۰۲ه.ش
٢٥ مُحَرَّمُ الحَرام ۱۴۴۵ه.ق
د لغمان د کرنې، اوبولګولو او مالدارۍ رياست په دې ولایت کې د ځنګلونو خوندیتوب او پراختيا په پار هڅې پیل کړي دي.
په همدې موخه د لغمان د کرنې، اوبولګولو او مالدارۍ رییس الحاج مولوي محمدولي محسن په خپل کاري دفترکې د لغمان مرکز کرنج اړوند د زرګرمالې، زیارت او دومیه کلیو له ولسونو سره د ځنګلونو د پرېکولو د مخنیوي په پار ناسته وکړه.
په دې ناسته کې د لغمان د کرنې، اوبولګولو او مالدارۍ رییس مولوي محمدولي محسن د نوموړې سیمې راغلو قومي مشرانو ته د ځنګلونو تولیدي او محافظوي ارزښت بیان کړ.
ښاغلی محسن طبیعي ځنګلونه د هېواد ملي شتمني او له منځه وړل یې جرم وګڼل، هغه له قومي مشرانو څخه وغوښتل چې د خپلې اړوندې سیمې د ځنګلونو د پریکولو په مخنیوي کې قومي ناغو او هوکړه لیکونو ته د پخوا په شان دوام ورکړي.
همداراز نوموړي راغلو قومي مشرانو ته په یادو کلیو کې د ځنګلونو د ساتنې او تنظیم لپاره د ځنګلدارۍ ټولنو د ایجاد خبره وکړه.
په ورته وخت کې راغلو قومي مشرانو د قومونو په استازولي د لغمان د کرنې رییس ته ډاډ ورکړ چې ځنګلونه به نه قطع کوي او د سر غړونکو په پېژندلو کې به همکاریو ته دوام ورکوي.
