خوست کي یوشمېر بزګرانو سره مرستې وشوې
۱۹ زمری ۱۴۰۲ه.ش
۲۳ مُحَرَّمُ الحَرام ۱۴۴۵ه.ق
د خوست د کرنې، اوبولګولو او مالدارۍ ریاست د ژغورنې نړیوالې کمېټې په همکارۍ ددې ولایت ۸۴ بزګرانو سره دکرنې او مالدارۍ په برخه کې نغدې مرستې کړي دي.
د چارواکو په خبره ددې ولایت د ګربز ولسوالی د «ارسلاخان پاس، لګي خېل او شامیت» کلیو کې ۴۸ بزګرانو سره نغدې مرستې شوي دي، چې په ترڅ کې یې د ارسلاخان کلي له ۲۶ بزګرانو سره د کرنې په برخه کې ۱۳۲ زره او ۹۰۰ ، چې هر کس ته ۵۱۱۱ افغانۍ رسېږي، دغه راز د لکي خېلو کلي ۳۵ مالدارانو سره ۱۳۲ زره او ۳۷۰ افغانۍ، چې هر کس ته ۳۷۸۲ افغانۍ رسېدلي او په شامیت کلي کې ۲۳ بزګرانو سره د مالدارۍ په برخه کې ۱۰۵ زره او ۱۷۰ افغانۍ نغدې مرستې شوي دي، چې هرکس ته ۴۵۷۲ افغانۍ رسېدلي دي.
همدارنګه دوی ته دهمکارې مؤسسې همکارانو اودګربزو ولسوالی دترویج کارمندانو لخوا ګتورې مشورې هم ورکړل شوي دي.
ددې مرستې موخه د بېوزله بزګرانو او مالدارانو ملاتړ او په ټوله کې دکرنې او مالدارۍ سکټور پراختیا ته زمینه برابرول دي.
