د هلمند دکرنې رییس د ملګرو ملتونو چارواکو سره وکتل
۱۹ زمری ۱۴۰۲ه.ش
۲۳ مُحَرَّمُ الحَرام ۱۴۴۵ه.ق
د هلمند ولایت د کرنې، اوبولګولو او مالدارۍ رییس الحاج مولوي نظرمحمد صدیقي په خپل کاري دفتر کې د ملګرو ملتونو د نشه یي توکو او جرایمو په وړاندي مبارزې دفترمشرې اغلې انوبا سود، د پروژیي خدماتو دفترمشر نیکولسن جیورج او همدا راز له افغان کډوالو سره د مرستې لپاره د ډنمارک کمیټې له مسؤلینو سره ناسته وکړه.
د ناستې په پیل کې راغلو مسؤلینو هلمند ولایت ته د خپل سفر په اړه معلومات وړاندې کړل او وې ویل، چې په دې ولایت کې یې د کرنې په برخه کې ګڼې پروژې بشپړ، روانې او یا هم د پیل په حال کې دي .
هغوی وویل، چې د بشپړ شویو او روانو چارو د مؤثریت ارزونه کوي، او د راتلونکو برنامو لپاره د مسؤلینو ترڅنګ د بزګرو او مالدارانو د غوښتنو او اړتیاو په اړه لومړیتوبونه په نښه کوي.
دوی تر دې مهاله په دې ولایت کې د مسؤلینو لخوا د کارونو د زمینې برابرولو څخه خوښي وښوده او په دې برخه کې یې د لا زیاتې همکارئ غوښتنه وکړه.
ورپسې د هلمند د کرنې رییس د هلمند ولایت د کرنې سکتور د ودې او پراختیا په برخه کې ددې ولایت د ځمکوالو او مالدارانو لپاره د مهمو او بنیادي پروژو د تطبیق او تمویل په برخه کې ورته لومړیتوبونه مشخص کړل
د هلمن دکرنې رییس وویل: «څرنګه چې هلمند یو کرنیز ولایت دی، الحمدالله په دې ولایت کې د کوکنارو د کر کچه تقریبآ صفر ته را ټیټه شوې ده، نو اړتیا ده چې دبزګرانو د کرنیزو محصولاتو لپاره د سړو خونو، د اوبو مهارولو برخه کې د وړو او لویو بندونو، د حیواني او نباتي ناروغیو د مخنیوی په برخه کې د امکاناتو برابرولو، د بېلابېلو اصلاح شویو تخمونو او د نشه یي توکو د بدیل په موخه د با ارزښته نباتاتو د ترویج او تکثیرولو برخه کې د ځمکوالو لپاره بنیادي کارونه ترسره شي.»
راغلو مسؤلینو د هلمند د کرنې رییس سپارښتنې واورېدې او په دې برخه کې یې د همکاریو ددوام او موثرو پروژو د تطبیق ژمنه وکړه.
