هلمند کې د باراني اوبو مهارولو په موخه د ګڼو ناورونو د سروې چارې پیل شوې
۱۳ کب ۱۴۰۱ه.ش
۱۱ شَعبان المُعَظّم ۱۴۴۴ ه.ق
هلمند چې، پراخې دښتې او ریګي سیمې لري، له پېړیو راهیسې په یادو سیمو کې د باراني اوبو د مهارولو او د اوبو زېرمه کولو په موخه ناورونه جوړ شوي دي، چې د څو لسیزو راهیسې یاد ناورونه د تخریب، ډکېدو او یا هم د له منځه تلو په حالت کې دي .
د هلمند ولایت کرنې، اوبولګولو او مالدارۍ ریاست په هلو ځلو او د ډاکار (DACAAR) مؤسسې په مالي همکارۍ سره په داسې حال کې چې ددې ادارې اړوند طبیعي سرچینو د څړځایونو مدیریت کارمندانو هم شتون درلود د ګڼو ناورانو د سروې چارې پیل شوې.
د یادو ناورونو په ترکیب کې د ريګستان په سیمو کې د ښورکي د سیمې ناوران شامل، دي چې په لوړه کچه به د باراني اوبو د مهارولو وړتیا ولري.
یاد ناورونه وروسته له څو لسیزو څخه یوځل بیا رغول کېږي، چې په رغېدو سره به یې په یادو سیمو کې د باران اوبه مهار شي، د ځمکې لاندې اوبه به ډیرې او د مالدارانو د مالونو لپاره د اوبو چمتو کولو ستونزه به ورسره حل شي.
د یادو ناورانو دوهمه سروې په داسې حال کې تر سره شوه چې تر دې وړاندې د اخند او حسن نيکه ناوران هم ورغول شول چې دا مهال ترې ګڼ مالداران او کوچیان ګټه اخلي.
باید وویل شي، چې د ا.ا.ا تر بیا واکمنېدو وروسته د اوبو مدیریت او کنټرول او دغه راز بزګرانو او مالدارانو ته د چوپړتیاوو د وړاندې کولو په برخه کې بې سارې هڅې روانې دي.
